Bhakti Song 189

இயற்கையோடு இணைந்திருப்பேன்.

எங்கும் இறைவன் அரசாட்சி
அகத்திலும் புறத்திலும் அவனாட்சி
இயற்கை அறிவிக்கும் அவன்மாட்சி
எதிலும் விளங்கும் அவன்காட்சி

சின்னஞ்சிறிய மலர்களுமே
சில்லென்று வீசும் தென்றலுமே
தவழ்ந்து செல்லும் மேகமுமே
சொல்லும் இறைவன் மேன்மையுமே

ஆர்ப்பரிக்கும் அருவிகளும்
அமைதியான ஓடைகளும்
நிறைந்து நிற்கும் நீர்நிலையும்
நிதமும் கூறும் அவன்புகழும்

எங்கும் அவனின் நிறைவிருக்கும்
எதிலும் அவனின் உயர்விருக்கும்
என்றும் அவனின் புகழிருக்கும்
எல்லாம் அவனைப் பணிந்திருக்கும்

என்ன பேரு நானும் பெற்றேன்
என்னை அவனே மீட்க உற்றேன்
அவனைத் தொழுதிட அருளும்பெற்றேன்
அவனுடன் ஆளும் உரிமைப்பெற்றேன்

இந்தப் பேருக்கு ஏற்றபடி
என்பணி செய்வேன் உள்ளபடி
என்பங்கை நான் அளித்திருப்பேன்
இயற்கையோடு இணைந்திருப்பேன்.

27-08-2013. காலை. 9.00