Bhakti Song 194

வந்தேன் உரிமையில்

எனக்காகவே நீ உன்னையும் அளித்தாய்
எதற்காகவோ நீ என்னையும் காத்தாய்
உனக்காக அளிக்க ஒன்றுமே இல்லை
அதற்காக அடியனை நீ புறக்கவும் இல்லை

நான் என்ன தருவது நீ என்ன பெறுவது
எனெக்கென்று என்னிடம் ஏதுதான் உள்ளது
வெறுமையாய் வந்து வெறுமையாய்ச் செல்வேன்
இடையினில் சொந்தம் எதுவென்று சொல்வேன்?

தாய்-தந்தை தந்தது என் இந்த தேகம்
மொழி, செயல், சிந்தை பிறர் தந்த தானம்
ஆன்மாவும் கூட உனது படைப்பாகும்
இவற்றில் என் சொந்தம் எது இங்குஆகும்?

இந்த உண்மை அறிந்தால் போதும்
அந்த உணர்வே என்சொந்தமாகும்
உணர்ந்தபின் நானும் உள்ளபடி வந்தேன்
உனதை உனக்கே உளமாறத் தந்தேன்

ஏற்க மறுப்பதும் உனக்கும் இயலாது
உனதை மறுக்க உன்னாலே முடியாது
இந்த ரகசியம் அறிந்தேன் நானும்
அதனால் வந்தேன் உரிமையில் மீண்டும்

23-09-2013, காலை, 9.00