Bhakti Song 613

உனதென்று ஆனேன்

நான் உனதென நாதனே ஆனபின்
எனக்கென இங்கு ஏதுமே இல்லை
உனக்கு உள்ளதை எனக்கெனத் தந்தபின்
எனக்கெனத் தனியாகக் கேட்கவும் இல்லை
அன்றே என்னை ஆட்கொண்ட பின்னே
அடிமை என்றுதான் உன்னடி வந்தேன்
அதன்பின் என்னை நானுமே மறந்து
என்னையே நீயாள முழுமையாய்த் தந்தேன்
சுயபுத்தி சார்ந்துநான் சிலசெய்த போது
சரியில்லை என்றுநீ சொல்லி விட்டாய்
உன்சித்தம் மட்டும் ஆகட்டும் என்று
ஒருவார்த்தை பேசாது பணிந்து நின்றேன்
அறியாமை என்னும் மனயிருள் கவ்வ
அடிக்கடி தவறுகள் நான்செய்த போது
ஏற்றபடி நீ என்னைத் திருத்தி
மீண்டும் உன்பாதைக்கு ஓட்டியே வந்தாய்
நீகாட்டும் கருணையை நான் எண்ணும்போது
ஏனிந்தக் கரிசனை என்றுநான் எண்ண
நீடித்த பொறுமையின் எல்லையைக் காட்ட
நாயனைப் பலமுறை நீயுமே மீட்டாய்
இந்த உண்மையை உணர்ந்த பின்னாலே
உனதென்று என்னைநான் தந்துவிட்டேனே
ஏழை என்னையும் ஏற்றுக் கொண்டபின்
எனதென்ற எண்ணத்தை இழந்துவிட்டேனே
மத்திகிரி, 28-1-17 (29-1-17௭), இரவு 12.45