Song 551

இன்னொருவரம்

இன்னொரு வரமொன்று நீதரவேண்டும்
இருப்பது போதாது இரங்கிட வேண்டும்
உன்போல் இரக்கம் நான்கொள்ள வேண்டும்
என்னுள் சுயநலம் நீங்கிட வேண்டும்

எதைநான் செய்தாலும் அதன்பின் சுயநலம்
எத்தனை இருக்குது இதையென்ன செய்வேன்
பிறருக்கு உழைப்பதாய் வேடமே போடுறேன்
இடையூறு இடைவர உடனே நிறுத்துறேன்

அதற்கும் ஆயிரம் காரணம் சொல்கிறேன்
அதைக்கூட ப்பிறரேற்க எத்தனை பேசுறேன்
இடையில் மனசாட்சி எடுத்தே சொன்னாலும்
அதைக்கூட அலட்சியம் எளிதாகச் செய்கிறேன்

உன்நீதி என்நெஞ்சை உறுத்திடும் போது
எத்தனை நியாயங்கள் எடுத்து உரைக்கிறேன்
அதன்பின் நீயும் அமைதி காக்க
அதைத் தாங்க இயலாது உன்னடிவிழுகிறேன்

ஏனிந்தப் போராட்டம் என்னுள் நீவைத்தாய்
என்தோலை உரித்து எனக்குக் காட்டினாய்
ஏதுமே கூறாது எப்படித் தண்டித்தாய்
இதைத்தாங்க முடியாது மீண்டும் மன்னிப்பாய்

சுயநலம் போக்கிட வரெமொன்று அளிப்பாய்
சுயத்தை நீக்கிடும் கிருபையும் அளிப்பாய்
இதுவரை தந்த வரத்துக்கு மேலாக
இதைஒன்று சேர்த்து நீயும் தருவாய்

மத்திகிரி 13-10-16, மதியம் 2.10