Song 552

வாழ்வளித்தாய்

அன்புடன் என்னை அரவணைத்தாய்
அத்துடன் எனக்கு வாழ்வளித்தாய்
இன்புற உனக்குள் வாழவைத்தாய்
இதைச் சொல்லிப்பாட வரமளித்தாய்

துன்பங்கள் பலவுற்று உழன்றுவந்தேன்
துயரக் கடலிலே முழ்கிநின்றேன்
தூக்கி எடுத்துக் கரைசேர்த்தாய்
துன்பங்கள் போக்கி மகிழ்வளித்தாய்

உனைமேலும் அறிய உவகைகொண்டேன்
உன்மேன்மை அறிய எண்ணம்கொண்டேன்
எளிய வழிகாட்ட இரக்கம் கொண்டு
என்சாயல் ஏற்றுக் குருவாய் வந்தாய்

ஆயிரம் கேள்விகள் அலையலையாய்
அலையென மோதி ஆர்ப்பரிக்க
அவற்றின் ஓசையை அமர்த்தி நீயும்
உன்னை அறியும் வழிவகுத்தாய்

அறிந்தேன் என்ற அகந்தை நீக்கி
அடக்கம் என்ற பண்பளித்தாய்
ஞானிக்கு மறைத்துப் பேதைக்கு அளிக்கும்
உன்குணம் தன்னைப் புரியவைத்தாய்

மத்திகிரி, 17-10-16, இரவு 11.15