Song 554

உனது நாடகம்

நடத்திடு நீ உன் நாடகத்தை
நாங்களும் போடுறோம் வேடமதை
வேடிக்கைப் பொருளாய்ப் போனபின்னே
மேடையில் ஆடிடத் தயக்கமென்ன

உலகமோ உனது மேடையாச்சு
நடிக்கவே எம்மையும் படைச்சாச்சு
எந்த வேடம் தந்தால் என்ன
எல்லா உரிமையும் உனதாச்சு

நடிக்க நேரம் வரும்போது
அழைப்பு உடனே வந்துவிடும்
அதுவரை கூட்டத்தில் அமர்ந்திருந்து
மற்றவர் நடிப்பதைப் பார்க்கவேண்டும்

நாங்களே நடித்து நாங்கள்பார்க்கும்
வேடிக்கை வேறெங்கும் கிடையாது
எங்களை விட்டால் நீ நடத்தப்
படைப்பில் எதுவும் கிடையாது

என்னவோ நீயும் தொடங்கிவிட்டாய்
எப்போ முடிப்பாய் தெரியவில்லை
எப்படி முடிப்பது என்பதுமே
உனக்கும் கூடப் புரியவில்லை

இறுதிவரையில் இருந்து பார்க்க
எதுவரை நீயும் படைத்திடுவாய்
இதுவரை இருந்து பார்த்தவர்க்கு
என்ன பதிலும் சொல்லிடுவாய்

எப்படிக் கதையை முடிப்பதென
என்பது உனக்கும் தெரியலையா
எதற்காய் எழுதினோம் என்பதுவும்
இதுவரை உனக்கும் புரியலையா

எழுதும் முன்னே யோசிக்கணும்
எப்படிக் கதையை முடிப்பதென்று
இல்லாவிட்டால் நெடுந்தொடராய்
இந்தக் கதையும் இருந்துவிடும்

மத்திகிரி, 19-10-16 (20-16-16), இரவு 12.15