Song 563

அவன் நாடகம்

நடக்கிற வரையில் நடக்கட்டுமே
நடத்துறான் அவனும் தினம்தினமே
நாமென்ன செய்ய இதனிடையில்
நடப்பதை வேடிக்கை பார்ப்போமே

அவனுக்கு இல்லாத அக்கரையா
அவன்தான் நடத்துறான் புரியலையா
இத்தனை தவிப்பு ஏனுனக்கு
எப்படிச் சொல்வேன் நானுனக்கு

ஒருமுடி கூட உதிராமல்
உன்னால் காத்திட முடிந்திடுமா
இதனைப் புரிய மறுக்கின்றாய்
எடுத்துச் சொன்னாலும் முறைக்கின்றாய்

அதைவிடு வேறொன்று சொல்லுகிறேன்
அதையேனும் நீ எண்ணிப்பார்
ஒருநாள் நோயில் கிடந்தாலும்
உன் நிலையைநீ நினைத்துப்பார்

சோறு தண்ணீர் இறங்காது
சேர்த்ததும் உனக்கு உதவாது
அவனே இரங்கி அருளாவிட்டால்
அதனின்றும் மீண்டிட முடியாது

சொந்தம் பந்தம் இருந்தாலும்
தாங்கியே உன்னைப் பிடித்தாலும்
சிகிச்சை ஆயிரம் செய்தாலும்
சுகத்தை அளிப்பது யார்சொல்லு?

இதற்கும் மேலே சொல்லிடவும்
எனக்கும் கூடத் தெரியவில்லை
இதுகூட அவனது நாடகம்தான்
அதுவும் உனக்குப் புரியவில்லை

நடத்துற அவனை நாடிவிடு
நானில்லை “நீ” எனக்கூறிவிடு
அப்புறம் உனக்கும் புரிந்துவிடும்
அமைதி தன்னால் வந்துவிடும்

அனுபவம் தந்த பாடமிது
அதையே உனக்கு நான்சொன்னேன்
இதன் பிறகு உன்பாடு
இனிமுடியாது ஆளைவிடு

மத்திகிரி, 28-10-16, இரவு 11.05