Song 568

இழக்கக் கூடாதது

உன்மீது அன்பு இல்லாமல் வாழ்வது
ஒருக்காலும் எனக்கு இயலாத ஒன்று
உயிரற்ற உடல்கொண்டு நடமாடமுயல்வது
இயலாத ஒன்று எவர்க்குமே இங்கு

நீரின்றி மீனுக்கு வாழ்விடம் இல்லை
நீயன்றி பக்திக்கு இலக்குமே இல்லை
சூரியன் ஒளியன்றித் தாமரை மலராது
உன்னருள் ஒளியன்றி எமக்கு வழியேது

அரும்பாகி, மலராகி, பூவாகி, பிஞ்சாகி
காயாகி, கனியாகி கைமீது வீழாமல்
மொட்டிலே கருகியே அழிகின்ற வாழ்வினை
மீட்டுத் தந்தது நீகொண்ட கருணை

இழந்து பார்த்தபின் இதனை அறிந்தேன்
இழக்கவே கூடாது என்பதை உணர்ந்தேன்
எனவே மீண்டுமே உன்னடி வந்தேன்
என்மீது நீகொண்ட அன்பை நினைந்தேன்

இழப்பதற் கென்று எத்தனையோ உண்டு
இழக்காமல் வாழ்வது இயலாத ஒன்று
ஆயினும் உனது அன்பினை இழக்க
அழிவின்றி வேறு வழியில்லை மீட்க

நினைத்தாலே நெஞ்சம் உள்ளே நடுங்க
நீ தரும் அன்பிற்கு மீண்டுமே ஏங்க
வந்தேன் உன்னடி மனமும் கலங்க
வருந்தி வேண்டினேன் மீண்டும்நீ தாங்க

மத்திகிரி 8-11-16, மதியம், 1.45, Surdas, 405, p. 703