Song 573

இயக்குனர் சரியில்லை

போதும் போதும் என்னை விட்டுவிடு
போராடி இளைத்தேனே ஆளைவிடு
நான்தான் கிடைத்தேனா ஆட்டிப்பார்க்க
நன்மை-தீமையை உரசிப் பார்க்க

இதற்காகப் பலபேர்கள் காத்திருக்க
எதற்காக வம்புக்கு இழுக்கிறாய்நீ
முடமாகி மூலையில் உட்கார்ந்தபின்
கோல் ஊன்றி நிற்கச் சொல்வதுமேன்

அதுவென்ன சொன்னாலும் கேட்பதில்லை
அதட்டியே பார்த்தாலும் விடுவதில்லை
கெஞ்சினும் என்னை ஏன் வஞ்சிக்கிறாய்
கோபித்தால் வீணாகத் தண்டிக்கிறாய்

இதற்கும் மேலாக என்ன சொல்ல
எப்படிச் சொல்லிப் புரியவைக்க
வேண்டுமென்றே நீயும் செய்கின்றாயா
விளங்காதவன் போல நடிக்கின்றாயா

ஒருநேரம் நடிக்கத்தான் சம்மதித்தேன்
உனக்காகச் செய்திட விருப்பம் கொண்டேன்
சிறுவேடம் என்றுதான் நம்பிவந்தேன்
சீக்கிரம் முடித்திட வேண்டிக்கொண்டேன்

அதற்கும் நீயுமே சம்மதித்தாய்
அதன்படி மேடையில் ஏற்றிவிட்டாய்
பிறர்வந்து அவர்வேடம் போடும்வரை
என்னை மட்டுமே ஆடவைத்தாய்

அதன்பின்பு என்பக்கம் திரும்பவில்லை
ஆட்டத்தை முடிக்கவும் சொல்லவில்லை
இதுபோன்ற இயக்குநர் எவரையுமே
இதுவரை நானுமே கண்டதில்லை

என்வேடம் எதுவெனத் தெரியவில்லை
எப்போது பிறர்வருவார் புரியவில்லை
நானாக இரங்கவும் வழியும் இல்லை
நடிப்பதைக் காணவும் எவருமில்லை

தன்னந்தனியாக ஆடுகின்றேன்
தன
க்குள்ளே வசனத்தைப் பேசுகிறேன்
எதற்காக ஆடுறேன் தெரியவில்லை
எப்போது முடிப்பானோ விளங்கவில்லை

மத்திகிரி, 11-11-16 (12-11-16) இரவு 12.15