Song 579

தெவிட்டா அமுது

இதுதான் உனது கிருபை என்பேன்
இதையே சொல்லிப் பாடவந்தேன்
எனக்கு என்று தனித்து நீயும்
தருவதை நானும் பெற்றுக்கொண்டேன்

என்னவோ உனக்கு என்மீது
இப்படி ஒருவிதத் தனிப் பாசம்
இதனை நானும் புரிந்த பின்னே
கொண்டேன் உன்னிடம் பெரும்நேசம்

காரணம் இதற்கு என்ன வென்று
கடைசி வரையில் புரியாது
ஆயினும் அதைப்பற்றி யோசிக்க
நேரமோ எனக்கும் கிடையாது

தினம் ஒருபாடல் எழுதிடவும்
துதித்து உன்னைப் போற்றிடவும்
பிறரைப் பற்றிப் பலசொல்லி
அவருக்காக வேண்டிடவும்

நேரமும் பொழுதும் போதவில்லை
நிமிட நேரம் ஓய்வில்லை
இதற்குமேலே என்தேவை
அத்துடன் ஆயிரம் மனக்கவலை

ஆனால் ஒன்றை நானறிவேன்
அதையும் பலமுறை சொல்லிவிட்டேன்
சுமக்க நீயே இருக்கும் போது
கவலைகள் எனக்கும் இனியில்லை

இதைத்தான் உனது கிருபையென்பேன்
இதையே தினமும் நான் பெற்றேன்
தேவைக்கு மிஞ்சியே தந்தாலும்
தெவிட்டா அமுதை நான்பெற்றேன்

மத்திகிரி, 18-11-16, இரவு 11.10